Calendario Viñetas do Camiño

Todos os proxectos que emprendemos son para nós importantes, pero hai algúns aos que é imposible non tomarlles unha estima especial.

A pasada primavera colaboramos co Concello de Fene na promoción de Viñetas do Camiño, unha aposta que poñía en valor o patrimonio material e inmaterial do Camiño Inglés ao seu paso por Ferrolterra a través do debuxo e a ilustración.

O resultado foi un feixe de obras saídas dos pinceis de algúns dos artistas máis representativos da comarca reunidas en dúas mostras: Unha virtual e outra física que nos derradeiros meses engalanou a ruta cara Compostela.

Para nós foi moi satisfactorio axudar ao Concello de Fene para que a veciñanza puidese seguir desfrutando un meses máis desas ilustracións, convertidas en protagonistas deste fermoso calendario institucional do 2022.