Ártabro Inclusivo, un proxecto en rede no que colabora Pingota Comunicación

Ártabro Inclusivo é unha ilusionante iniciativa que involucra a tres administracións -os Concellos de Fene, Ferrol e Narón- e varias institucións e entidades e que se está a desenvolver durante este ano e o que vén ao abeiro do GALP Golfo Ártabro Norte.

O proxecto ten tres obxectivos fundamentais:

-Erradicar a contaminación mariña retirando os plásticos que van parar ao mar e dándolles unha segunda vida.

-Fomentar a economía circular precisamente a través da transformación destes plásticos

-Promover a inclusión social coa posta en marcha de talleres de plásticos en Aspaneps e de obradoiros de plástico e madeira en Saúde Mental Ferrol, Eume e Ortegal para que sexan as persoas usuarias destes centros as que elaboren novos produtos a partir desa materia prima recollida do mar.

Colaboracións

Conta coa colaboración da Universidade da Coruña a través do Laboratorio de Plásticos a Escola de Deseño Industrial, ámbolos dous con sede no campus de Ferrol, e tamén do CIFP Ferrolterra, e tenta implicar directamente tamén ás Confrarías de Pescadores de Barallobre e Ferrol.

É, como se pode ver, un proxecto moi completo no que en Pingota Comunicación colaboramos a través do Plan de Comunicación e do programa de dinamización, e a verdade é que o traballo é ben satisfactorio. Agardamos que vos gusten tanto o logo que deseñamos para Ártabro Inclusivo como a imaxe e lema do cartel: “Fóra do mar, o plástico ten valor”.

A aposta pola economía circular, pola loita contra a contaminación mariña e a vertente social son moi importantes para nós, que defendemos sempre as iniciativas sostibles porque entendemos que necesariamente a sociedade ten que avanzar nesa dirección.

Convidámosvos a participar no programa de actividades, que comezan xa e que nos parecen moi interesantes: limpezas de praias, conferencias de persoas como o pescador influencer Rogelio Santos ou Gema Neira, CEO de Cholita (unha empresa que se dedica á reciclaxe de redes de pesca) ou unha demostración aberta ao público do funcionamento das máquinas para reciclar os plásticos dentro da iniciativa Precious Plastic. Agardámosvos!